城中鏡：名醫想當年「上車 」話咁易
早前金融管理局再加樓市「辣招」，只令交投放緩，青年人嘅上車夢依然望門興嘆。一班城中名醫講開當年置業，確實輕鬆得多。香港牙醫學會早前搞春茗，名人到賀，講起置業，牙醫學會會長Sigmund梁世民自爆當年畢業一年後就做業主，畀一成首期上車，供百多萬元嘅物業話咁易，相比依家出道嘅牙醫，算係好彩。
梁世民（中）同梁家騮（左）都喺年輕時輕鬆置業。右為食物及衞生局醫療規劃及發展統籌處處長孫玉菡。
梁栢賢（左）一早打定流感針，香港醫療專業人士協會副主席鄭淇德醫生就勤踩單車健身。
律師會前會長王桂壎（左）同現任會長熊運信齊出席牙醫學會春茗。
Sigmund二十三歲就做業主，畢業嗰年人工有兩萬元收入算唔錯，儲一年錢就夠畀首期，喺荃灣買第一層樓，可惜佢當年未有瞓身買多幾層，否則依家印印腳唔使做嘞！立法會醫學界議員「怪醫」梁家騮都係年輕置業，佢話畢業後喺公立醫院工作，有房屋津貼，儲三、四年錢就上樓。佢又提醒年輕人置業咪心急，否則要承受風險。
律師會前會長王桂壎就等到三十五歲先置業，佢當年買樓係死慳死抵兼多得家人幫手先圓夢。春茗上，話題離唔開冬季流感，醫學會前會長謝鴻興話香港醫生唔多願打流感針，估計每一百個人當中，只有三成人有打針，比率遠低於歐美國家，提醒醫生們唔好掉以輕心，有打好過無打。
梁栢賢以身作則早打針
話口未完，醫管局行政總裁梁栢賢被人問起打咗流感針未，佢答得爽快：「一早打咗啦！」話晒都係醫管局高層，無理由唔以身作則嘅。講番牙醫學會，今年大計多多，Sigmund話嚟緊將為八十歲攞緊長者生活津貼嘅老人家免費鑲活動假牙，計落每人可以慳番兩萬元，預計有十二萬長者受惠。
