政壇：搞搞政：黃洋達約戰阿Man擂台拗數小學雞
話說「忠義民團」嘅阿Man上星期向熱血公民黃洋達下戰書，要求佢應邀上擂台對決。黃洋達上次聲稱「唔知醒」未現身接信，而「瞓醒」嘅黃洋達尋日一早預備枱櫈講數，仲有身穿道袍嘅熱血公民成員喺辦公室門口恭候，而阿Man就喺二十幾名「忠義民團」成員陪同下到場，再下戰書兼一齊討論拳賽細節。佢哋初步同意比賽按照綜合格鬥（MMA）規則進行，九月或之前打擂台，作為挑戰者，阿Man需要提供二十萬元做賽事按金，但點畀錢就遲啲先傾。
黃洋達質疑阿Man有走數前科，攞對方早前因佔旺而生意受損，揚言跳樓一事大肆恥笑，話「你之前話跳樓都走數啦！」要求對方先畀二十萬元訂金，阿Man初頭還價十萬元，但最後都應承畀錢。
場地問題仲未解決
喺場地方面，黃洋達聲言要搞大個Show，要求喺灣仔伊館舉行，更索價一百萬元。佢又話如果喺康文署場地比賽，當局會要求拳賽要有拳擊總會人員在場，比較麻煩，建議喺酒店搵個ballroom舉行。阿Man還價，指有相熟師傅可以提供場地，兩邊陣營你一言我一語，更爆粗取笑對方咩都唔識，最後場地問題都係解決唔到。
之後上磅量體重，黃洋達約166磅，阿Man就177磅，按照意向書內容，限磅範圍介乎167至172磅，即係黃洋達要增加1磅，而阿Man要減5磅先「打得成」！阿Man仲話會喺比賽時讓黃洋達，「你35歲我40歲，我讓你5年又點話！」夠晒霸氣。雖然文件都簽咗，但兩人就繼續拗埋啲小事，當黃洋達要求阿Man提供中文全名以免走數，阿Man就只係肯寫英文名Man Shek，一搞就已經拖咗半個鐘，稍後都唔知會唔會又為場地問題拗數。
