「阿瑟王」、行政會議成員兼中文大學前校長李國章,前日被委任為香港大學校務委員會成員,外間更加盛傳佢好大機會接替十一月退任嘅梁智鴻擔任校委會主席。港大校長馬斐森尋日話,唔會揣測李國章會唔會做主席,而主席人選亦都唔到佢決定,但李國章喺學術、醫學同政治上都有豐富經驗,係合資格嘅主席人選(Well-qualified candidate)。

馬斐森同沈祖堯(前左及右)一齊主持「兩大校長盃」開球禮。

馬斐森尋日同中大校長沈祖堯一齊主持「兩大校長盃」開球禮,佢話好歡迎李國章加入校委會,有信心大家可以好好合作,期望可以貢獻校委會。李國章早年任教統局局長同中大校長時作風強悍,馬斐森覺得李國章有強烈個人意見係好事,可以促進討論。對於港大學生會憂慮李國章會影響院校自主,馬斐森指保護院校自主係整個委員會嘅集體責任。至於副校長任命問題,馬斐森話仲要等物色委員會調查,而校務委員會將喺本月三十一日再次開會。

第一手消息請下載on.cc東網iPhone/iPad/Android/Windows Phone Apps