面對「垃圾圍城」危機一觸即發，政府焗住大力減廢，但近年環保業界仍批評力度唔夠。環境局局長「星星」黃錦星尋日出席一個活動時用「五行」金、木、水、火、土，解釋政府一直有「做嘢」。佢話「金」代表金漆招牌，品質保證局早排聯同業界搞咗個廢食油認證計劃，成功提高業界聲譽，佢仲透露年底會有更多唔同認證出爐。

黃錦星以「五行」解釋當局一直有扶持回收業界。

「木」就代表立竿見影，寓意環境局即將出台嘅膠袋徵費、垃圾徵費等政策，如果可以同業界合作無間，相信減廢會有顯著成效。至於「水」，星星就話水為財，局方設立嘅十億元回收基金絕對可以幫到業界；「火」就係「伙伴」咁解，代表政府同業界攜手合作。

咁「土」又代表乜嘢呢？除咗現有環保園外，政府仲會成立跨部門小組，對業界作出土地支援。星星話自己係建築師出身，事事講科學，但估唔到有時都講下風水術數。唔知佢又有冇算吓自己今年有冇阻滯呢？

第一手消息請下載on.cc東網iPhone/iPad/Android/Windows Phone Apps