婚後低調喺香港定居嘅台灣第一千金Lesley馬唯中，之前返台北探親，佢尋日畀台灣傳媒發現低調返港。身為台灣總統馬英九千金，Lesley本來可以避開人群，舒舒服服咁用機場貴賓通道辦理登機手續，但佢就揀同其他乘客一齊排隊，認真無架子。

尋日下晝，Lesley拖住行李現身桃園國際機場，見佢直接去航空公司嘅報到櫃枱辦理登機手續，之後就一個人經管制區過關出境，全程無保鏢陪同。Lesley平時會有媽咪周美青送機，但尋日罕有無出現，就連Lesley嘅老公Allen蔡沛然都無現身，唔知係Allen搭第二班機返港吖，抑或根本無同太太一齊返台北呢？

Lesley前年閃嫁金融才俊Allen，婚後住喺中環堅道。熱愛藝術嘅Lesley早前獲西九旗下視覺文化博物館（M+）錄取，兼職擔任水墨藝術策展人一職。當時外界盛傳佢之所以唔肯全職工作，係要以家庭為重，方便隨時「造人」。不過，報道引述機場工作人員話，Lesley當時個肚無隆起，相信暫時都無好消息可以公布嘞！

第一手消息請下載on.cc東網iPhone/iPad/Android/Windows Phone Apps