政壇：林健鋒做壞規矩犯眾憎
十一月二十二日舉行區議會選舉，按傳統，無論泛民、建制喺區選層面都會做內部協調，避免撞區嘥彈藥。不過，隨住新民黨等中小型政黨誕生，議席僧多粥少下，做「細」嘅一係接受命運安排，一係就做「曳仔」同建制大黨正面交鋒，其中由林健鋒等多名立法會議員做核心嘅經民聯，近年銳意開拓新界東、新界西同九龍西版圖，據悉佢哋拒絕認命，違反協調機制四處派人空降挑機，惹起建制大黨不滿。
根據機制，除非係新選區，假如該區已有現任建制區議員，或者已有建制政黨派人挑戰現任泛民主派，其他政黨都要收隊，以免內訌造成資源浪費，甚至相互鎅票益咗對家。經民聯喺一二年立法會選舉後拉雜成軍，不惜照抄富貴黨嗰套，泵水四處收購「現成」區議員加強地區樁腳，仲漁翁撒網式派人落區。
火炭沙田爆搶位戰
其中該黨社區發展幹事、靚仔律師申偉基空降火炭選區，硬撼當區區議員龐愛蘭，打算以律師對藥劑師「格食格」鎅票。申偉基仲意有所指話，對比區議員淨係幫政府、財團講說話，佢會主打地區議題，為市民發聲，戰意甚濃。作為建制派一邊幫政府、一邊為市民發聲，難度認真高。
另一戰區就係建仔嘅余倩雯自動當選嘅沙田禾輋邨，身兼經民聯成員嘅沙田鄉事委員會主席莫錦貴，舊年喺該邨開設辦事處暨沙田支部，明顯衝住民記而來，據悉佢哋派出沙田社區幹事李德華挑機。另有口痕友透露，佢哋又懶理公民力量一直部署收復畀新民主同盟丘文俊佔據嘅乙明選區，一於做「第三者」介入泛民、建制之爭，博建制大黨知難而退，做壞晒規矩，未搶到議席已經犯眾憎，下場係點真係拭目以待。
