巴士脫班無王管 運署淪為無牙虎

唔係亂噏，家陣巴士班次仲飄忽過無定向風，脫班誤點多過食飯，淨係睇吓本報投訴版，就知問題有幾嚴重，有乘客甚至試過呆等超過一粒鐘，問你怕未。你知啦，香港搵食艱難，打工仔爭分奪秒，遲大到隨時連飯碗都冇埋，你話搭巴士係咪得不償失吖。

巴士服務甩漏多多，亂象叢生，照計港府應該加強監管至係，可惜事實啱啱相反。呢，有立法會議員建議效法港鐵，引入懲罰機制，又或者透過優惠補償畀乘客，聽落似乎有得諗，點知運輸及房屋局反應冷淡，佢哋話喎，港鐵比較容易掌握列車運作情況，而且巴士脫班多數同路面情況有關，兩者好難類比。咁即係點吖？由得佢繼續脫班咯喎？

冇錯，巴士脫班有好多原因，塞車、修路都可能令班次延誤，好難訂立一刀切罰則，不過咁唔代表官僚可以關人個關，聽之任之o架。唔講唔知，二十年來，運輸署淨係向巴士公司罰過八千蚊咁大把，其餘多數係發警告信了事。當局監管形同虛設，巴士公司梗係懶得就懶啦。

話時話，巴士脫班已經唔係一朝一夕嘅事，申訴專員公署已炮轟過好多次，運輸官僚次次都話會關注跟進，點知情況唔止冇改善，反而不斷惡化。鬼咩，有巴士公司用俗稱「鬼巴」嘅不停站班車篤數，運輸署居然隻眼開隻眼閉。最離譜嘅係，唔知係咪為咗掩人耳目，運輸署將脫班嘅定義定到有咁寬鬆得咁寬鬆，只要喺一個時段開足班次，唔理你五分鐘一班抑或半個鐘一班，照樣可以過骨，唔怪得次次公布脫班率都係個位數字啦。

其實，一為神功二為弟子，巴士公司改善服務，除咗方便乘客，對自己亦有好處o架。本港鐵路網日漸完善，鐵路為主，巴士為輔，已經係大勢所趨，巴士公司嘅客源本來就買少見少，加上服務水準下跌，只會進一步趕客，結果惟有靠加價為皮，但愈加價就愈趕客，形成惡性循環，最後只會導致雙輸嘅咋。

無論點都好喇，巴士始終有存在價值，尤其係鐵路網覆蓋唔到嘅地區，巴士服務更加唔少得。唔該港產官僚做好自己份工，加強監管巴士公司，改善服務質素，唔好繼續由得巴士脫班遲到喇，叮！