政壇：搞搞政：港大被指反共基地 李國章做校委（目及）實
尋日政府委任行會成員李國章出任港大校務委員會成員，接替上月辭職嘅律師會前會長黃嘉純，三年任期即日生效。李國章早年出任教統局局長同中大校長時，已因其強悍作風被謔稱為「沙皇」、「阿瑟王」，今次離開中大「娘家」殺入港大，加上適逢港大校委會主席梁智鴻十一月退休，令人揣測「阿瑟王」加入港大係為接掌該校校委會鋪路。
設計圖片及對白
我哋尋日問過李國章，佢即耍太極話唔明何謂「鋪路」，強調加入港大純粹「頂黃嘉純個位」，反叫我哋唔好信謠言。佢仲話，雖然過去二十幾年都情繫中大，但自嘲畀人話教壞學生，依家咪唔教書囉！
自言「N+1」屆都唔選特首
不過，佢過去多年同學界牙齒印幾深，今次任命例牌不獲港大學生會支持，該校學生會會長馮敬恩直斥佢對教育界毫無建樹，舊年仲公開叫罷課嘅學生索性退學，言論令人反感，揚言一定會跟進佢上任後嘅工作。
事實上，港大喺佔領行動前後均被指係「反共基地」，特首梁振英喺施政報告更點名批評港大學生會刊物《學苑》鼓吹港獨，該校上月又破天荒通過退聯公投，成為第一間退出學聯嘅大學，政府今次委任「阿瑟王」，可能就係睇中佢管理大學嘅經驗，安排佢加入港大校委會，睇實該校人事任命同財政狀況都無可厚非。
再問李國章會唔會選特首，佢話自己「N+1」屆都唔選。
