政壇：滙豐前一姐任港交董事
政府尋日宣布，委任前滙豐香港「一姐」馮婉眉同奧緯諮詢亞太區主席席伯倫做港交所董事，任期兩年，下月二十九日生效。馮婉眉將會係繼梁高美懿後，再有銀行女大班加入港交所。
馮婉眉
本月初，社商賢匯發表最新嘅本港女性董事年度報告，提到恒指成分股女性董事比例首次錄得雙位數，由去年嘅百分之九點六升至百分之十一點一，係○九年以嚟最大嘅升幅。港交所作為上市公司嘅「榜樣」，今年帶頭加入多啲女性董事自然順理成章。講真，港交所六名董事係由政府委任，即係話仲有好多空間可再加入女性董事，何妨未來再加多一、兩個女董事。
至於另一名新董事席伯倫，市場就可能唔係咁多人識。聞說佢領導嘅奧緯諮詢係一家國際管理顧問公司，喺行內好有地位，聽聞港交所高層都對佢寄予厚望，希望佢可以喺風險管理同擴大上市公司來源方面幫到港交所。
此外，聽聞席伯倫仲有另一個身份，係已故知名藝術家張大千嘅女婿。
