上月底發表財政預算案後，財爺鬍鬚曾例牌巡迴宣傳預算案措施，尋日就輪到同年輕人對談。鬍鬚曾面對後生仔始終鬆懈啲，唔止應學生要求selfie（自拍）一番，仲有問必答，除踢爆阿仔自細數口差外，仲自揭幾十年來留鬚之迷。不過，堂堂財爺之所以留鬚原來冇經過精密統計，一切都係源於迷信。

鬍鬚曾（左三）應學生要求玩自拍。

鬍鬚曾尋日同逾三百名中學生及網上青年對談，被問到點解咁鍾意留鬚，佢解釋早喺中學時期已經蠢蠢欲動，可惜阿媽唔畀。直至大學開始學劍擊，眼見好多勝出國際比賽嘅劍擊手，同埋當時好多電影型男都有留鬚，懶型下一於跟風，仲話覺得留鬚打劍都打得好啲添！

佢又透露，當年除咗靠留鬚致勝，每次比賽都會着同款T恤上陣，但比賽後有冇洗呢？佢就唔肯講嘞！如果着臭衫就可以贏比賽，佢好應該諗吓着乜嘢先唔會再年年估錯數囉！

第一手消息請下載on.cc東網iPhone/iPad/Android/Windows Phone Apps