政壇：施榮忻匿廁所勤練氣功
香港菁英會創會主席施榮忻，原來唔單止參與推動青年事務，近期連氣功都好埋，仲練氣功練到入廁所添！佢透露，舊年因飲得太多茶，導致心跳兼不受控咁眨眼，周身唔自在。舊年八月經朋友介紹識咗一位福建同鄉中醫師，一見如故，仲拜師門下學習內家氣功，名為「內養功」，主要鍛煉五臟六腑，強健筋骨。師傅教佢由紮馬、閉氣開始，聽落好似很容易，但認真練，唔使一陣就會頭暈眼花。
施榮忻成功勁減十七磅，連褲頭都顯得「鬆泡泡」。
捱過起步期，眨眼已學識十多式，但練開有癮，幾忙都會趁空檔時段匿喺廁所練功十五分鐘，日子有功，氣色好咗，最明顯係肚腩消失咗。短短半年間，極速瘦身十七磅，腰圍由三十八減到三十四吋，瘦咗成個碼，褲頭鬆到放得落幾隻手指。
