區議會選舉年底就舉行,各黨派都想搶多啲議席。有意參選屯門富新選區嘅新民黨新進青年甘文鋒預咗要打一場硬仗,事關除面對區內另兩名對手,仲要應付佔領行動後冒起嘅新組織挑戰。但阿鋒話冇有怕,揚言地區工作係深耕,唔係落區一、兩次就搞得掂。

甘文鋒(左)不時同黨副主席田北辰(右)落區處理地區事務。(互聯網圖片)

阿鋒所屬嘅選區主要有兩位對手,分別係獨立人士同法團副主席。依家距離選舉剩大半年時間,佢話一星期有六日都要做地區工作,平日朝早六點幾起身同街坊耍六通拳,之後仲會一齊飲茶,打聽吓唔同選區嘅情報。講開建制派最煞食嘅蛇齋餅糉,佢認為都有存在價值,又反問泛民或年輕人點解唔關心吓屋企長者嘅需要。

對於佔領行動後陸續成立嘅新組織揚言要喺區選分一杯羹,阿鋒就質疑有啲後生仔成日話要落區宣揚民主理念,但呢啲並唔係居民最需要嘅嘢,反而路邊一塊成日絆倒老人家嘅地磚,先係最急切要解決嘅問題喎。