政壇：泛民唔畀立會增保安
喺舊年立法會討論新界東北發展計劃前期工程撥款申請同佔領行動期間，因畀示威者衝擊，搞到立法會大樓「傷痕纍纍」，立會行政管理委員會委託嘅顧問公司建議大樓加強保安措施，而秘書長陳維安尋日仲親身向泛民主派「飯盒會」解畫。不過，泛民就反對有關措施，話做法等同將立法會變成銅牆鐵壁、將市民拒之千里喎。其實泛民先至係大樓受衝擊嘅始作俑者，依家又反對加強保安，唔通泛民真係想立會無王管，等佢哋可以為所欲為？
設計圖片及對白
舊年多次發生示威者衝擊、破壞立會大樓事件，令大樓多處受損。佔領行動期間，泛民仲濫派議員職員證，畀策動佔領嘅人士甚至示威者可以長期喺大樓入面休息同瞓覺，令立會形同無掩雞籠。
行管會之前就委託顧問公司，檢討大樓保安措施兼就保安問題提出意見。顧問公司就建議喺大樓多處加設鐵閘同捲閘、加強安檢、喺俗稱「鼓底」嘅立會公眾示威區嘅閉路電視增設錄音功能，同時為議員申請職員通行證數目設限。
質疑天眼錄音侵私隱
身兼飯盒會召集人嘅公文袋黨魁「袋巾傑」梁家傑話，泛民表明唔希望任何為處理非正常情況而設嘅保安措施，話咁只會令立會更封閉，令大樓成為對用家唔友善嘅地方，而本身係行管會成員之一嘅公文袋議員陳家洛就話，無需要特別為立法會增加保安措施，又質疑閉路電視加錄音功能係侵犯私隱，仲話唔需要為議員申請職員證數目設限，只要議員「坦白」就夠喎。另一議員陳偉業亦都話會反對任何加強保安嘅措施，仲會睇吓加鐵閘會唔會引起消防安全問題，如果會嘅話就去信消防處投訴咁話。
秘書處今個月底就會完成諮詢工作，將有關意見向行管會匯報。至於行管會點處理，陳維安就話行管會要靠佢嘅智慧去決定喇！
