地區工程一味拖 奈何好事又多磨
講起「香港速度」，以前係又快又有效率咁解，可惜吖，家陣已經變成爭拗不斷、拖得就拖嘅代名詞。呢，淨係睇吓社區重點項目計劃，推出接近三年，拖到依家仲係十畫未有一撇，問你服未。
係咁嘅，現屆政府首份施政報告提出向十八區區議會分別發放一億元，推行社區重點項目，原意係繞過官僚程序，提高行政效率，加快地區建設。點知人多口雜，各區爭拗多多，一時話未有充分諮詢，一時又話對環評及土地運用權未有共識，結果一拖再拖。好嘞，拖到去年九月，各區工程名單終於出爐，之但係要成功喺立法會「過三關」，一啲都唔容易。
所謂「過三關」，首先要得到立法會民政事務委員會支持，然後過埋工務小組委員會一關，最後由財委會批出撥款。係人都知，反對派大搞不合作運動，工務小組又被佢哋把持，到底幾時至可以走完所有程序，冇人答得到。目前十八區入面，只有葵青區嘅社區健康服務分階段投入運作，其餘各區嘅項目快則下周闖第一關，慢則延至明年第一季，到時區議會已經換屆，分分鐘將項目推倒重來都似。
即係咁，難得港府唔做孤寒財主，大手筆撥款畀區議會搞好地區工程，本來應該皆大歡喜，點知死拖爛拖、乜都拗餐飽嘅歪風由立法會蔓延到區議會，白白浪費唔少時間。咁都未算吖，部分地區工程華而不實，好似大埔區議會提出喺林村許願樹廣場大興土木，加設「許願樹屋」及興建五間度假屋，被人質疑冇諮詢公眾兼撈過界，萬一度假屋入住率唔理想，盞嘥錢嘅咋。
再講吖，時間就係金錢，延遷時日嘅結果，係工程成本不斷上漲。呢，多個區議會牙痛咁聲，擔心一億元不敷應用而四出科水，唔係搵馬會幫手埋尾，就係招請合作夥伴承擔工程費用。萬一最後傾唔掂數咯喎，隨時又係政府包底、納稅人埋單嘅咋。
講到尾，地區工程好事多磨，政府有責任，政客亦難辭其咎。如果唔係佢哋為反而反、為拉布而拉布，點會搞到工程議案大塞車吖。其他唔講，淨係十大基建工程，由於不斷延誤，成本不斷上升，保守估計超支逾千億元。你話嘞，政客連重要嘅民生議題都唔放在眼內，又點會將區議會工程放上心吖？所以話，香港想唔沉淪都幾難，叮！
