SUN搞作：網絡小說：總統之苦
KGB總統一度冇露面成十日，國際間傳言四起，有人話係政變，又有人話佢陪女友分娩，仲有人話佢流感中招，甚至畀外星人捉咗，總之九萬幾種說法，係又噏唔係又噏啦。
彼邦嘅黑人總統，聽完情報人員一貫似是而非嘅報告，都搞唔清KGB總統呢十日到底去咗邊，諗呀諗呀，覺得政變冇咁易，畀外星人捉咗又太無稽，於是搵齊一班智囊，希望分析出個所以然來。智囊A道：「佢咁鍾意打獵，九成九畀老虎叼咗去，梗係班特工救番佢，所以先保住條命仔！」智囊B緊接：「我話佢咁鍾意赤膊騷肌肉，肯定係冷親流感先啱！」
智囊C不作揣測，反問黑人總統：「總統先生，點解你唔WhatsApp問吓佢？」話音未落，黑人總統已經一舊磚頭，吖，唔係，係一部手機飛埋去，爆粗道：「What乜x嘢App呀，就係你班廢物話唔安全，唔准我用智能手機，搞到我WhatsApp又冇，微信搖一搖又冇，溝少幾多女呀……」做總統，果然唔係咁歎。
