政府多年來都「估錯數」,年年財政赤字變盈餘,估唔到呢個風氣竟然蔓延至立法會。話說立法會行政管理委員會喺尋日開會,其中討論到本財政年度及來年財政年度預算,原來今個財政年度因為各種原因高估咗開支,使少咗錢。

受累佔領 參觀團大減

據悉,今個財政年度立法會開支較預期少,當中包括慳電、開設調查委員會冇預期咁多、有多名職員退休及人手編制少咗;因為手語翻譯人手不足,未能在所有會議中推廣。

其實我哋之前都講過,佔領行動搞到立法會參觀教育導賞團人數下跌,紀念品預算開支更按年狂跌五成八,所以要促銷紀念品。睇埋呢個預算,似乎立法會又唔使咁擔心喎。

另外,行管會又討論議員黃毓民投訴總保安主任,涉嫌喺去年財務委員會審議新界東北發展規劃前期工程撥款時,落柯打阻住佢開車離開嘅報告。

報告認為總保安主任行為令人誤會,並非恰當,但唔涉及刑事成分,最終建議保安主任向毓民道歉了事。

第一手消息請下載on.cc東網iPhone/iPad/Android/Windows Phone Apps