政壇：搞搞政：阿Ann出線鬥方剛 爭講「反水客擾民」
北京舉行兩會，香港立法會都暫停兩星期大會，今日恢復會議。城中最熱門嘅事就係反水貨客行動，唔少議員都爭住出手，本來自由黨批發及零售界議員方剛成功喺下周大會上動議辯論反水貨客行動，不過，民建聯都想搶飲頭啖湯，仲出動鍾樹根、蔣麗芸（Ann）同葛珮帆大包圍進攻，最後得阿Ann可以喺今日大會上提出書面質詢，出線同方剛鬥一番。
設計圖片及對白
樹根葛珮帆出招失敗
反水貨客活動喺過去多個周日搞到滿城風雨，居民及店舖東主都好不滿，建仔尤其肉緊，上周已經出動樹根，諗住叫佢喺今日會議上提出緊急口頭質詢，但呢招不獲立法會主席曾鈺成批准，只好「收回」。
黨友葛珮帆眼見緊急質詢呢招唔奏效，諗住轉一轉個角度要求喺今日會議上提出休會待續議案，內容當然都係講反水貨客活動對香港法治、經濟、民生有咩影響，政府應該有咩對策等，不過，曾鈺成尋日作出書面裁決，話佢提出休會待續議案嘅理據無迫切性，就算遲啲提出動議，辯論都唔會失去意義。
其實，方剛喺下周三大會都提咗類似嘅動議，所以主席建議葛到時先至表達意見喎。今次真係建仔搶咪，但係唔夠方剛快手囉。
