民政事務局局長曾德成逢星期日靠「局長隨筆」同市民「交流」，好似習慣做鍵盤戰士咁，尋日佢罕有現真身，出席傳媒茶敍，不過，講嘅、答嘅都好冇焦點，對於轄下即將換屆嘅青年事務委員會、公民教育委員會，以至其政治助理最新招聘情況等，德成局長通通封口，咁盛傳民政局前常秘楊立門（圖）接掌公民教育委員會呢？佢就應咗句「好似仲想唱歌」，直接幫楊閂埋後門。

青年問題以至政改爭議近期都鬧得熱哄哄，民政局都有份主理呢兩方面嘅事務，但係適逢《基本法》下月頒布二十五周年，政府除咗喺學校搞填色比賽之外，仲有冇其他新橋幫助青年們認識《基本法》呀？

德成局長話填色比賽都係一種推廣方式，透露十八區區議會都會舉辦相關展覽，加強宣傳，又話睇到今時今日港人對《基本法》了解真係不足喎。《基本法》頒布咁多年都仲停留喺舉辦展覽，唔怪得港人認識咁貧乏啦！

第一手消息請下載on.cc東網iPhone/iPad/Android/Windows Phone Apps