政壇：四叔86歲大壽訂製精緻朱古力
今年嘅白色情人節，恒地主席李兆基四叔（右圖）有禮物，就係一盒好sweet、好特別嘅朱古力，仲有四叔Crossover白之戀人添，朱古力內附一張生日請帖，原來四叔本周四86歲大壽。
四叔特別訂製嘅白之戀人朱古力，盒內有佢嘅生日請帖。
印自己嘜頭 刻「萬事如意」
四叔幸運號碼係「6」，今年又係86歲，所以佢特別歡喜，搞搞新意思，佢農曆正月二十九日出生，計番今年新曆係三月十九日，每年都係白色情人節前後，而佢早前去咗北海道旅行，參觀咗白之戀人館，所以咪好有情趣咁訂造咗一批四叔嘜頭朱古力，上邊仲印埋四叔至愛嘅「萬事如意」四個字，隨生日請帖附贈。
四叔大壽，每年都係低調咁喺佢半山麥當勞道惠苑大宅食飯，赴宴嘅有至親好友同恒地高層，不過，聞說人數不斷增加，聽聞今年要大開15圍添，雖然有成二百多人，但四叔屋企有成八千呎，坐擁私家天台泳池嘅三層複式單位，肯定冇有怕。而宴席相信都係例牌由「富豪飯堂」福臨門到會，再加親友送上嘅超大蛋糕，而呢排已經陸續有生日禮物送到，鮑參翅肚再度堆滿國金中心Office。
