政府早前向立法會提交文件，建議大幅提高區議員薪酬同實報實銷開支上限，但同樣受選舉法例規管及選舉產生嘅村代表，每年只係得八千元津貼，唔少鄉紳都大呻唔公平！上水鄉事委員會主席侯志強就疑似獅子大開口，建議將津貼由每年八千元提高到三萬元，點知依然畀鄉議局主席劉皇發笑佢開價太低，侯志強即刻食住上，改口話：「咁開五萬，等政府還三萬啦！」街市買餸咩？仲有得講價，不過，全港村代表就拍爛手掌囉。

設計圖片

不過，講番村代表嘅津貼，又難怪佢哋要出來爭取加薪，自從一○年有咗村代表津貼開始，呢筆津貼額就一直冇加過，一季二千元嘅津貼，除開平均每日僅得二十二元，真係食個下午茶就無咗。有唔少村代表都曾經大呻，日日全天候去服務村民，但係就連最低工資都拎唔到。

發叔笑「太少」 即改口加碼

侯志強尋日就喺鄉議局執委會會議提出特別提案，要求鄉議局同政府商討提高村代表津貼。佢話，每年得八千元村代表津貼，班代表連車馬費都唔夠畀，雖然村代表工作係義務性質，但都應有合理對待，建議將村代表津貼加到去每年三萬元。侯志強一講完，現場好多人拍手表示支持。侯志強忽然出招，莫非佢真係想爭鄉議局副主席？

不過，發叔一聽到侯志強咁講就即刻笑住問，「開價會唔會少咗啲呀，開三萬？」侯志強諗咗一諗，即刻改口話，「咁開五萬啦！」原來，佢係想一開始叫高個價，等政府方面有還價空間，到時政府就算壓價，都可以有兩萬元走盞，貫徹鄉紳數口精嘅特質！佢哋將會向政府提出有關建議，仲計劃同民政事務局局長曾德成討論有關安排添！

第一手消息請下載on.cc東網iPhone/iPad/Android/Windows Phone Apps