水貨活動屢禁不止,激進分子乘機鬧事,搞到香港家嘈屋閉,七國咁亂。冰凍三尺,非一日之寒,水客問題涉及好多因素,香港固然有責任,內地亦有責任o架。

呢,最近反水客示威演變成暴力衝突,唔止旅客受衝擊,連老弱婦孺亦成為受害者,導致兩地關係進一步惡化,內地官員紛紛表態,話會透過協商解決問題,紓緩香港壓力喎。深圳市委書記王榮講得仲坦白,佢承認深圳海關處理水貨時有腐敗現象,令問題更加惡化,會加強打擊咁話。

冇錯嘞,深圳海關處理水貨存在腐敗現象,其實早就唔係新聞。咁多年來,當地海關人員涉及貪腐嘅醜聞不絕於耳,舊年八月之嘛,皇崗海關五名科級官員因涉嫌放縱走私罪被拘捕,成個物流處三百幾人全部停職接受調查。淨係十八大以來咋,深圳海關查處官員違紀違法案件就有近二十宗,問你怕未。

海關人員貪贓枉法,同走私集團狼狽為奸,除咗令水貨問題雪上加霜,更加授人以柄,令激進組織同港獨勢力有機可乘,咪搞到香港永無寧日囉。正所謂,知恥近乎勇,深圳官員既然知道海關有腐敗現象,就要加強打擊,唔好手軟喇。今時今日中央全力反腐,大老虎打完一隻又一隻,海關嘅貪官只不過係小小蒼蠅啫,又點可以例外呢。

當然喇,水貨問題搞到今時今日咁嘅地步,唔止成為香港亂源,亦成為激化兩地矛盾嘅禍根,深圳海關執法不嚴有責任,港府後知後覺同樣難辭其咎。咁多年來,訪港旅客不斷增加,而本港嘅配套設施就十年如一日,幾乎冇增加過咁滯,接待能力嚴重不足咯喎,又點可能唔出事呢?最近多位內地官員間接批評港府不作為,連全國政協新聞發言人呂新華亦表示三年前已知道個人遊秩序開始出現混亂,反而港府好似若無其事咁,一直闊佬懶理,直至問題爆煲,先至將問題推畀中央,要求檢討個人遊喎,你話係咪離譜吖。

嗱,今日又係星期日,激進組織又出嚟搞事喇,佢哋事先張揚一日內「光復」新界同九龍幾個地區,連禮賓府都唔放過,可以講係處處火頭,分分鐘又係亂過亂世佳人,賞花嘅市民自求多福吖。講到底,解決水貨問題要靠兩地合作多管齊下,而要阻止激進組織嘅暴力就要靠港府嚴厲執法,千祈唔好再姑息吖,叮!

第一手消息請下載on.cc東網iPhone/iPad/Android/Windows Phone Apps