區議會選舉鐵定十一月二十二日舉行,黨派磨拳擦掌,作為近年冒起得最快嘅建制政黨,新民黨更出奇招添,據了解,該黨度咗條好橋,使出銀彈政策,為落區插旗嘅新丁提供房屋津貼,據知唔少新丁獲黨資助搬去區議會選區所在嘅屋苑,希望總有一個黨友喺左近。

設計圖片及對白

主打中產區使費勁

由於該黨主打中產區,所以即使只係半額房津,都要幾千蚊起標,之不過,當選後仲有冇房津就唔知喇。唔知呢招同主席葉劉淑儀嘅多年政府工作經驗有冇關呢?

新民黨標榜黨員位位專業、高學歷,家吓出埋呢招,使費好大噃,雖然該黨表面上唔多見接受大額捐款,又或有善長以幾千萬元競投字畫,但幾位領導本身都係「大水喉」,好似葉劉咁,唔係年初突然「中伏」、被黑客入侵電郵戶口騙取佢瑞士銀行戶口幾萬元美金,都唔知佢家底富貴到要去瑞士私人銀行開戶口啦!至於黨副主席田北辰執掌咁多間連鎖時裝店,財力就更加唔使講嘞!

除咗房津,葉劉創黨前任職政府多年,唔多唔少都將政務官文化帶入黨。有黨友透露,該黨內部架構嚴謹,事無大小都要黨員白紙黑字寫報告兼存檔。其中一個經典例子,就係社區主任想幫街坊搞活動,都要填表格交代活動目的、預期效果等,填錯資料仲要彈番轉頭再填過。

第一手消息請下載on.cc東網iPhone/iPad/Android/Windows Phone Apps