政壇：女童軍百年大慶 李周美枝忙不停
香港女童軍總會（總會）今年換高層，候任香港總監李周美枝（Pearl）五月初履新。變陣後嘅首個大騷係明年女童軍成立一百周年，Pearl話，已密鑼緊鼓籌備「千人大露營」，到時將有來自世界各地過千名女童軍參與。
李周美枝（左）即將履新，梁王培芳上前恭賀一番。
Pearl早前一身唐裝現身總會嘅新春團拜，雖未正式上任，但佢已開始忙，事關總會新項目多，要籌劃新總部又要搞青年旅舍，每項大計都牽涉多個政府部門，開會都有排開，佢呻連做運動都無時間，幸好姊妹們上下一心，齊齊出錢出力搞好會務。當日到場嘅仲有香港管弦樂團董事局副主席蔡關穎琴（Janice）、總會副會長梁王培芳、名譽副會長方劉小梅及鄧鳳賢等人。
