政壇：廢嶽開位自肥 卸鑊政府
人稱「廢嶽」、「周一鑊」嘅食物及衞生局前局長周一嶽（圖），自前年獲政府「翻閹」出任平等機會委員會（平機會）主席後，依然連番被爆大鑊。最新一鑊就係佢喺未充分諮詢其他平機會委員嘅情況下，自行建議加設一個月薪逾十六萬元嘅營運總裁職位，幫佢分擔大量行政工作，預計每年最少增加近二百萬元公帑開支，但佢自己就一毫子人工都唔使減。周一鑊尋日出席活動時繼續死撐，卸責話係應政府要求研究開位喎！
周一鑊死撐開位係應政府要求但隻字不提自己減薪。
周一鑊話，○六/○七年審計報告及立法會政府帳目委員會已要求平機會聘請營運總監，政府亦已批咗撥款，只係職位一直懸空。現時平機會確有唔少工作需要負責統籌嘅領導層做內部研究同分析，所以先重新考慮政府當年嘅建議，仲話政府過去都有追問幾時開位喎！
講就係咁講，但班議員都話過，平機會增設行政總裁後周一鑊好應該減人工囉，唔減就等於開位「自肥」，唔該佢下次正面回應呢個問題。講開又講，出晒名唱歌走音嘅周一鑊尋日出席活動時，又再拉埋運輸及房屋局局長張炳良同一眾年輕歌手唱「We Are The World」，認真身痕。
