反水貨客示威浪潮持續，無論建制、泛民陣營都建議政府檢討個人遊政策，不過商界就唔係咁諗。中華總商會副會長方文雄（David）尋日出席一個活動時話，好多歐洲國家嘅零售業水盡鵝飛，香港即使多水貨客，逼到街頭同部分店舖水洩不通，但都係一個令人好羨慕嘅問題喎！

David話歐洲好多國家經濟不景，失業率達雙位數，人人都好珍惜旅客到訪，因為市民冇就業，就冇辦法改善生活，影響成個經濟。David呢個例子係好兩極嘅對比，事實係，亦有歐洲名勝區被遊客逼爆，搞到當地居民要求市政府限制旅客唔准用拖篋，避免製造噪音。

不過，David都話部分年輕人隨街辱罵內地人洩憤、發脾氣係冇用嘅，建議年輕人將水貨客嘅影響化為數據向政府表達，唔應該只係一味感性咁製造問題喎。

第一手消息請下載on.cc東網iPhone/iPad/Android/Windows Phone Apps