政壇：鍾庭耀熱臉貼上冷屁股
二○一七年特首普選用乜嘢方案都未知，泛民主派立法會議員已經做咗兩次大龍鳳，二十幾人一再表示要否決，搞到政圈滿城風雨。港大民意研究計劃總監鍾庭耀日前建議，先搞一次全民投票蒐集民意，然後立法會議員按民意行事。佢講完之後，有人批評天真，有人質問點樣綑綁議員？過咗幾日，泛民議員潑冷水，公文袋嘅梁家傑仲攞番去年已有調查費事睬佢。建制派都唔睇好，尋日連政府中人都一致反對，呢次鍾庭耀嘅投票膏藥真係冇晒市場囉。
設計圖片及對白
雖然係咁，鍾總監都不厭其煩，每次介紹佢嘅建議時，都好似招攬生意咁，詳細披露點樣進行投票，籌備期要兩個幾月，需要數以十萬元運作，又需要幾多人參與等。可惜，今次嘅反應同舊年年初就差太遠囉。
泛民陣營幾乎冇人接招，梁家傑即日已唱反調，攞番去年六二二嘅調查，話當時市民已經表態要求泛民否決唔符合國際標準嘅政改方案，所以唔需要再做多次。其他泛民大黨亦無意再做一次。建制派議員仲質疑全民投票嘅法律依據同效力。立法會政黨意見分歧成咁，點游說佢哋按投票結果行事呀﹖
高官亦批可行性低
行政會議召集人林煥光尋日出席一個場合時亦話，要期望政府同立法會議員都按投票結果行事，其實存在唔少障礙，譬如可能要立法，呢個短期內唔易做到，又認為各界可以參考依家嘅獨立民調啫，一句講晒，即係鍾庭耀嘅建議繁複而可行性低喇。
政改三人組嘅袁國強仲講到明，即使有全民投票結果，但好難得到立法會各黨議員一致認同同履行噃。既然係咁，呢個又嘥錢、又嘥人力嘅調查做咗又有乜用呢﹖
