官場音樂椅又再響起，今次輪到多個局長新聞秘書大執位。一番調動後，商務及經濟發展局局長蘇錦樑（Greg）嘅新聞秘書郁得最密，唔通Greg蘇真係咁趕客？

聽聞政制及內地事務局局長譚志源（Raymond）嘅新聞秘書葉潔梅（Bonnie）將會調去房屋署，接替文惠玲（Connie）出任房屋署嘅資訊及社區關係總監兼負責房屋事宜嘅總新聞主任。而Greg蘇嘅新聞秘書杜婉冰（Winnie）就會調去政制局接替Bonnie，而Connie就會調去填補Winnie嘅空缺。原本公務員每隔三、四年就重新調位或改變工作性質係好正常，但係Winnie出任Greg蘇嘅新聞秘書都未夠一年噃。

話說Winnie原本派駐北京，去年十月先至調返香港，接替升任政府新聞處助理處長嘅吳綺媚，出任Greg蘇嘅新聞秘書，點解未夠一年又再調職呢？八卦友話畀我哋聽，外界一直有傳Winnie同Greg蘇不咬弦，Greg蘇一向都同公務員團隊摩擦多多，一來信唔過下屬，二來又唔鍾意下屬搶佢嘅風頭。唔知接手嘅Connie可唔可以同佢合作愉快呢？

第一手消息請下載on.cc東網iPhone/iPad/Android/Windows Phone Apps