政壇：公文袋終得「總管」接班人

公民黨（公文袋）前總策劃幹事黃晙（Ian）佔中期間捲入非禮男性青年醜聞，被迫無限期休假。公文袋其後尋咗Ian嘅上手、當時啱啱喺英國讀完書返港嘅歐陽志飛（歐飛），暫代呢個「大內總管」職務，但佢講明只會做到今年四月。咁啱Ian早前獲判無罪，仲有人再見佢現身黨內活動，唔通佢會「翻閹」做總幹事？

黃晙現身公民黨活動，惹來「翻閹」總幹事疑雲。

消息傳出後，立即惹來黨內外人士議論紛紛，認為Ian雖已被判非禮罪名不成立，但庭上公開嘅案情細節頗為露骨，如果由佢做番總幹事，難免會進一步影響公文袋嘅形象，至於年底區議會選舉嘅選情，亦恐怕會畀對手喺私底下向啲師奶同教徒選民大做文章。

最新消息係，公文袋啱啱喺前晚通過，委任佢哋其中一位執委余冠威接任總幹事一職，貪佢做過該黨黨魁梁家傑嘅議員助理，合作一定冇問題，亦冇聽過佢有乜桃色問題。至於Ian同歐飛唔做總幹事之後，據聞會繼續以義工身份留喺個黨度幫手。