野豬有餐開箭豬來湊熱鬧
【本報訊】「啲野豬好淒涼呀，成日食山上面嗰啲污糟嘢……警察嚟嗰陣（圍捕野豬），成個禮拜都冇得食。」為野豬準備晚餐的婦人侃侃道出野豬慘況，「依家係BB豬第一餐，陣間兩點幾仲要準備大豬嗰一餐，我好忙啊！」
婦20年前餵貓 近年餵豬狗
六十餘歲婦人對動物愛心爆棚，「十幾廿年前開始餵貓，兩年前開始餵狗，上年五月開始餵野豬，依家連箭豬都嚟埋，佢哋（箭豬）一家七口從梯級行過來，噠噠噠，不知幾得意。」她又表示現在每天只睡三數小時，簡單梳洗後，便深夜四處收集賣剩的麵包及飯盒廚餘。回想第一次見到野豬時感到好害怕：「點知佢哋會唔會攻擊我？我畀啲嘢佢食，點知又食喎，跟住同我好friend啦。」
每天黃昏，都會見到她僂佝的身軀，雙手挽着數個載滿麵包及飯餸的大膠袋，步履蹣跚吃力地走到山坡一個平地，將袋中食物傾倒在鋪好的大膠布上。因食物沉重，她每次都行至微微喘氣：「我好忙o架！整完呢度畀豬仔同貓食，又要到上面，嗰度仲有好多貓等緊我餵佢哋。」「麵包要全部從膠袋內取出，炒飯又要從幾十個飯盒扒出來，陣間仲要拆骨畀貓食，唔咁樣做牠們根本食唔到。」
她餵豬地點旁樹幹上掛着不要餵飼野生動物的告示，她嗤之以鼻：「啲人雀仔、野豬、貓、狗都通通唔鍾意，佢哋連老竇老母都唔鍾意啦。」講完便收拾物品，趕往另一地點準備餵貓。
