公僕宿舍多養蚊 無殼蝸牛望樓嘆
孤寒財爺曾俊華話年輕人「渴望心中富有」喎，計太一叮話齋，時下年輕人係咪心中富有唔敢講，但港府袋中富有就肯定嘞，唔止財政儲備達到天文數字，土地物業亦田連阡陌，對貧無立錐嘅無殼蝸牛嚟講，簡直係天堂與地獄。
嗱，長遠財政計劃工作小組發表第二階段報告，包括審視總值二千四百億元政府物業，以及總值二千九百億元嘅九家政府企業，建議出售多幅公務員宿舍用地。理由好簡單，港府早年改變政策，只有九○年前入職嘅公務員至合資格申請入住宿舍，而該批公務員將陸續退休，預計十七年後即係二○三二年全部人去樓空。報告認為，其中九幅位於豪宅地段嘅高級公務員宿舍用地及二百多個位於私人物業嘅單位，租值偏低，加上政府唔鼓勵炒樓，建議全數出售，一方面賺取收益，一方面增加土地及房屋供應。
冇錯嘞，港府拓土建屋慢過龜爬，家陣不費吹灰之力就可騰出九幅地皮，好過周圍「盲搶地」吖。尤其呢九幢高級公務員宿舍大多位處山頂、半山等黃金地段，估計可套現近六百億元，港府雖然出名敗家，斷估唔會嫌錢腥啩。
其實，呢啲所謂嘅高級公務員宿舍，根本係殖民地政府收買人心嘅手段，早就應該檢討。唔係咩？今時今日，市民連搵個竇口棲身都難，公僕居然入住媲美豪宅嘅高級府第，何止講唔過去，直情係官富民貧嘅證據。計太一叮話齋，唔止呢九幅用地應該出售，其他閒置嘅公僕宿舍亦應該物盡其用，你知喇，家陣樓價愈炒愈高，上車愈嚟愈難，無殼蝸牛已經滿肚冤屈，政府仲要白白糟蹋土地，問你點頂！
話時話，港產官僚敗家成性，任由公僕宿舍丟空養蚊確係有迹可尋。呢，舊年審計報告踢爆政府未有善用名下物業，唔少公務員宿舍過剩多年，當中涉及數百個單位，但係產業署居然闊佬懶理。仲有吖，全港七十幾幅私人會所用地淪為富豪俱樂部，港府冇收回建屋，為無殼蝸牛雪中送炭，反而匆匆續約，為權貴錦上添花，簡直豈有此理。
所以話啫，港府成日「無地呻吟」，話乜嘢寸土必爭，見縫插針，其實地從何來係十足假命題，淨係收收埋埋嘅大量土地資源已經可以蓋好多屋，解決好多問題。一句到尾，香港唔係冇地，而係冇有能力、有承擔嘅政府。叮！
