仲有幾日就係三八婦女節,每年呢個時候,社會上循例都有一啲香港女性地位嘅討論,事後卻唔見有乜改進。好似上市公司增長女性董事咁,幾年來進展好慢,社商賢匯最新嘅報告研究咗企業嘅表現,結果係有七間藍籌公司過去七年間,從未委任過女性出任董事,當中包括東亞銀行、煤氣公司等,拖累本港表現追唔上其他國際市場,真係醜兼累人呀!

魏余雪奕認為,本港女性喺商界嘅發展,仍然面對文化阻礙。

社商賢匯行政總裁魏余雪奕話,對於香港增長速度好失望:「女性仍然面對緊文化上嘅阻礙,否定女性可全面參與香港經濟增長,而且排斥佢哋擔任決策者嘅職位。」佢又話,類似東亞銀行呢啲家族企業,問題尤其嚴重,難怪東亞銀行今次喺榜上包尾。睇嚟,香港要保住國際金融中心嘅地位,真係需要打破陳見、急起直追。

第一手消息請下載on.cc東網iPhone/iPad/Android/Windows Phone Apps