城中鏡：「鐵醫」家族上郵輪玩轉東南亞
人稱「鐵醫」的香港大學外科系主任盧寵茂日忙夜忙，執手術刀多過執老婆隻手，尋日我哋喺一個新春團拜活動遇到盧教授，佢透露喺剛過去嘅情人節、農曆新年，佢上咗超級郵輪「瑪麗皇后二號」玩番轉。今次唔單止同太太把臂同遊，仲約埋好耐冇一齊旅行嘅五個好兄弟伉儷添。
盧寵茂（後排右二）同太太（前排右二）早前聯同其他兄弟伉儷上咗「瑪麗皇后二號」玩。
盧教授話，難得長居美國嘅二哥、三哥返港度歲，六兄弟聚首一堂，即刻計劃去旅行。佢哋個個攜眷出動，由香港飛去新加坡上船，玩咗獅城熱門景點「濱海灣花園」，之後三日上岸，分別去咗柬埔寨、越南同海南島，日日有新節目、新景點，認真爽。盧教授原來仲係「鐵醫柔情」，好識氹老婆歡心，夾埋其他兄弟，齊齊趁情人節訂定六束紅玫瑰，令六位盧太都笑逐顏開。
盧教授講笑話快樂不知時日過，玩咗八日，年初三瞓醒覺就返到香港，有啲意猶未盡咁。
