城中鏡：施榮恆卸任力作造福長者
東華三院尋日新春團拜，主席施榮恆（Ivan）與一眾成員聚首一堂，齊齊為新一年祈願。做埋今個月就卸任嘅Ivan話，手頭上有大把工作需要完成，目前佢就爭取緊於內地建立一個慈善基金，希望於香港大學深圳醫院附近或鄰近本港嘅地方設立多啲長者住宿設施，等有意喺內地安享晚年嘅長者可以多一個選擇。
東華三院副主席王賢誌（左起）、總理蔡榮星及馬清揚齊向市民送上新年祝福。
施榮恆預計東華新社企餐廳於八月正式開幕。
馬陳家歡為小孩着想，去旅行帶埋乾冰，雪住朋友幫手整嘅BB食品。
講到任內最滿意嘅事，Ivan話係見到東華旗下社企食肆「善膳軒」運作暢順，預計今年八月白田邨嘅新分店「膳深軒」正式開幕，當客人以正價購買一份餐時，可補助基層家庭以十元享用營養熱食飯餐，延續行善精神。
馬陳家歡遊日 不忘子女健康
副主席馬陳家歡、李鋈麟及王賢誌亦有出席，記者見馬陳家歡精神奕奕，原來佢趁農曆年前一家五口去咗日本北海道及大阪旅行叉電。老公湊住五歲及兩歲嘅小朋友去滑雪，佢就同八個月大嘅小朋友行街街，而為咗子女飲食健康，佢仲特地帶埋朋友製作、用蔬菜等雪凍而成嘅BB方塊食物去。
總理黃業光就剛去完意大利返港，仲獲邀於當地車廠邊開餐、邊欣賞新發布嘅靚車，兼夾快手落埋訂，年底就有新車落地喇；之後佢順道去埋米蘭購物，兼於倫敦探望讀緊設計嘅女兒。
至於總理蔡榮星就同父母回鄉過年，於汕頭歎正宗潮州菜，佢話潮州菜唔係淨係得打冷，今次佢哋就食咗好多美味海鮮。前主席李三元則留港陪伴九十幾歲嘅媽媽過年，認為本地過節好有氣氛。
