政改方案能否通過，各方討論多多，關鍵係泛民立法會議員有幾人會轉軚支持，近日有泛民提出各種可以考慮「袋住先」嘅條件，人民力量決定狙擊轉軚嘅泛民議員，仲有升級考慮添，除咗喺區議會選舉發起狙擊外，功能界別議員都唔會放過喎。而出手最重嘅恐怕係陳偉業（大舊）。

聯繫社群 非單打獨鬥

大舊話，今年嘅區選，佢哋原本針對建制派就派出約二十人參選，但如果泛民有人轉軚支持政改，佢哋就會「空群而出」，狙擊轉軚嘅議員同政黨。如果轉軚嘅係功能界別議員，即使人力唔會派人出選功能界別議席，相信亦都會有「義士」喺立法會選舉展開狙擊喎。

大舊仲講到明，佔領行動期間，佢哋同唔少參與社群都有聯繫，相信今次嘅票債票償運動，人力唔會再係單打獨鬥，絕對比一一年區選時更加壯大添。

本周六，人力會喺旺角行人專用區發起「麒麟俠怒打港共小人」活動，今年新加六名被指有機會轉軚嘅泛民議員，包括衞生服務界李國麟、教育界葉建源、民協馮檢基、資訊科技界莫乃光、會計界梁繼昌及公民黨湯家驊。人力中人話，行動係要「揼實」佢哋張票，等佢哋「實啲」、唔好轉軚喎！

第一手消息請下載on.cc東網iPhone/iPad/Android/Windows Phone Apps