好多人都想跟股神巴菲特學投資,但原來股神都有失手嘅時候,巴菲特早前就喺一年一度嘅股東信中承認,佢都有投資犯錯,仲透露其中一個錯誤,佢用咗二十年去糾正,另一個錯就令佢唔見咗一千億美元,對,係美元呀。

巴菲特話,佢第一個錯係鬥氣鬥返嚟。呢個錯誤喺一九六二年發生,當時股神買咗間紡織公司嘅股份,揸咗兩年,大概持股百分之七,其後紡織公司原股東一度有意向佢買番啲股份,雙方接觸傾過價,但對方要求再低啲,雖然個價位巴菲特都賺硬百分之五十,但佢條氣唔順,不單企硬唔賣,仲意氣用事加大入股。二十年後,股神終於投降,斬纜結束該一直唔掂嘅紡織生意。不過,股神就Keep住用呢間紡織公司個名,冇錯,就係今時今日係人都識嘅巴郡!

第二個錯發生喺一九六七年,巴菲特用八百六十萬美元向佢老友收購保險公司National Indemnity Co.(NICO),由於持股公司有其他人揸手,巴菲特最終眼白白睇住一千億美元流入人地荷包。之後,股神用咗四十八年嚟問自己點解!即使有啲錯,過去五十年巴郡嘅回報率都高達1,826,163%,驚人咁高,股神始終係神!

第一手消息請下載on.cc東網iPhone/iPad/Android/Windows Phone Apps