政壇：林奮強憂未來基金為偷懶
新一份財政預算案提出設立「未來基金」，預留資源開展關鍵嘅基建項目，即使將來經濟有逆轉，政府都有足夠彈藥應變，智庫組織「香港黃金五十」創辦人、行政會議前成員林奮強尋日就批評呢個建議，仲指摘政府只係搵唔做嘢嘅藉口。
林奮強尋日出席一個電台節目，講到未來基金，佢直言擔心會變成「遲來基金」，最後成為港府「今日不做事」嘅藉口，故步自封。一向被視為應屆政府好友嘅佢又批評，港府過去數年都錯估盈餘，長年無增建醫院，所以現時應趁財政穩健時，立即改善住屋及醫療服務，而非再搞「未來基金」，如果當年一早能夠投資興建商場等設施，相信已解決到現時旅客承受能力等問題喎。
講得好有遠見，唔通佢想搶財爺嘅飯碗？不過，有口痕友就話，佢家吓講乜都得喇，事過境遷，唔需負責嘅車大炮，人人都識喇。
