青年事務委員會主席陳振彬（Bunny）做埋今個月就卸任，繼任人選一直只聞樓梯響，Bunny斬釘截鐵否認會連任，仲話下任主席嘅年紀唔係最重要，意思係唔一定要青年人至可以做主席。

陳振彬話青年事務委員會唔係青年議會，主席年紀並唔係問題。

Bunny去年因為以五十六歲之齡任青年事務委員會主席，而被外界質疑佢究竟代唔代表到年輕人意見，但Bunny話委員會係就青年政策提供意見，唔係「青年議會」，要有心得、有經驗、有時間先至勝任，所以年紀唔係問題。

早前盛傳香港青年聯會主席霍啟剛會由委員會成員升呢做主席，Bunny就話人選除咗可以喺委員會內物色外，外面都有好多選擇嘅。唔知呢個位，最後由邊個接手呢？

第一手消息請下載on.cc東網iPhone/iPad/Android/Windows Phone Apps