政壇：夏千福普通話論「道」避「政」
被喻為「小八國聯軍」之首嘅美國駐港總領事夏千福，被中方批評過之後，近期低調咗好多，就算出席活動，對本港政改都三緘其口。夏千福尋日出席道教聯合會舉辦嘅道教藝術家廖宗東畫展開幕禮，一樣唔講政治，只談宗教，而佢兩分鐘嘅致辭，更全程以字正腔圓嘅普通話發言，並向在場賓客拜年。見佢手持嘅「貓紙」講稿亦係簡體中文字，相信背後下過不少苦功，所以博得在場嘉賓掌聲。
廖宗東（左）向夏千福（右）送贈一幅媽祖畫像，指夏與媽祖構成「一陰一陽」。
香港道教聯合會為迎接道教日，將展出數十幅廖宗東嘅道教神仙工筆畫，當中繪畫了眾多道教神仙，栩栩如生、活靈活現。夏千福話，好高興獲大會邀請，並好欣賞廖宗東嘅畫作，佢致辭後，繼續用普通話同廖宗東交談，可見佢嘅普通話水平都唔差。廖宗東亦欣賞夏千福的普通話，並送贈一幅媽祖畫像，廖指夏千福係男人，屬陽，而媽祖是女性，屬陰，正好構成道教的一陰一陽。
