政壇：公文袋辣慶白鴿黨
政壇上嘅夥伴，唔一定係真心朋友！民主黨（白鴿黨）上周五舉行二十周年晚宴，由於佢哋揚言要杯葛政府第二輪政改諮詢同要否決政改方案，搞到政府一眾高官都杯葛該黨晚宴，冇問責官員到場，不過，白鴿慶生日，最火滾嘅都未必係呢一筆，據聞，白鴿黨最嬲嘅並唔係高官，而係泛民主派陣營內嘅「友好」，首推公民黨（公文袋）疑唔畀面，一個立法會議員都冇出席，立法會泛民兩大黨竟然搞到咁樣，係咪出咗事呢？
話說白鴿黨上下好重視今次黨慶活動，但當晚公文袋一個巨頭都冇，就連該黨嘅立法會同事都齊齊隱形，只得執委梁穎敏、新界東地區支部主席楊岳橋及地區發展主任余德寶出席。所以有人質疑唔通除咗政府高官杯葛外，公文袋領導層都玩嘢？
長毛玩嘢提辭職公投
聞說該黨法律界議員郭榮鏗本來答應出席，但就唔知點解放飛機。而公文袋嘅黨魁梁家傑就寧願去睇管弦樂表演，都唔畀面出席晚宴。咁嘅境況難免會令人覺得泛民兩大政黨不咬弦。但有人就稱，了解後得悉其實係因為公文袋幾位議員溝通不足，大家都以為對方會赴宴，結果擺晒烏龍。點都好，泛民友好唔畀面，反而建制派唔少議員當晚熱情捧場，呢個場面多少都令人感覺尷尬，兼連想多多。
另一樣令白鴿黨不滿嘅就係長毛係晚宴中提及辭職公投。話說有「AV仁」之稱嘅白鴿黨前主席何俊仁宣布計劃辭職發動公投，企圖推翻人大「八三一」決定，搞到過往都會出席白鴿黨晚宴、甚至科水畀佢哋嘅建制派中人都喺今年縮沙，所以該黨都冇再高調提及辭職公投，以免「趕客」。點知長毛就喺度玩嘢，所以唔少白鴿黨人都好嬲長毛。好好彩，最後晚宴都籌到逾三百萬元，白鴿唔使冇面兼冇錢，只係得一殼眼淚。
