城中鏡：總行燈光匯演 滙豐賀150周年
滙控近排是非不斷，行政總裁歐智華逃稅風波都未甩身，隻腳又差咗入單欠差餉官司中，雖然只係涉及僅三萬八千蚊差餉，但始終唔老利。適逢今日係滙控喺香港成立150周年紀念日，呢間老牌大行係時候要沖喜沖喜。
為慶祝150周年，滙豐總行大廈會進行燈光匯演。
點沖喜？中環滙豐總行除咗新添兩頭石獅子外，原來為慶祝150周年，滙豐又用2,652盞LED燈條，喺中環總行架起三面展示牆，將大廈外面嘅燈光系統全面升級，計劃由今晚七點開始，晚晚喺總行大廈進行燈光匯演。
2,652盞LED燈好嘥電？絕對唔會，事關滙豐今次用嘅全部都係節能燈，比普通燈膽慳一半電，完全有顧住企業社會責任。
記者又聽聞，滙豐為咗紀念150周年而發嘅紀念新鈔，會喺周三公布細節，周四供大眾申購。
滙豐例牌話「不予置評」，150周年紀念新鈔，聽講面值係150蚊，撲定唔撲，你話呢！
