政壇：自拍合照高永文唔求其
政界近期興起自拍熱，食物及衞生局局長高永文、副局長陳肇始、政治助理陳凱欣等人尋日齊齊現身醫院管理局新春團拜，當港大感染及傳染病中心總監何栢良遇上高永文時，即刻拉埋一齊自拍，期間何栢良疑好熟手咁一隻手拎住智能手機，一邊就度準角度影相，殊不知何栢良自拍第一擊，高永文睇完張自拍照後唔收貨，嫌張相影得佢肥，要求即時重拍，何栢良亦即時執生改為「高炒」自拍，仲齊齊chok到好行，終於有二人V面合照誕生。
高永文（右）嫌自拍照影得佢肥，要求何栢良重拍。
除咗高永文同何栢良自拍，據聞高永文喺新春致辭後，旋即被在場大批「粉絲」包圍，個個排住隊搵佢影相，男女通殺，齊齊笑咪咪咁自拍，據聞之後仲有張大合照，今次由高永文親自操刀，同在場傳媒行家、何栢良等大合照，最終試咗一次就成功嘞！
