政壇：團體甩底東北申述流會

城規會見有人未發表意見，於是決定「擇日重賽」，揀咗尋日同聽日（4日）加開兩日嘅申述會，等村民表達意見，點知尋日城規會會議等咗成一個鐘，申述團體代表依然人影都冇，城規會主席周達明最後只好宣布流會收場。

李肇華料各人「忙緊嚟唔到」

城規會會議原訂尋日朝早九點正式「開波」，城規會委員一早到場坐定定，職員亦準備就緒，而喺北角政府合署地下大堂設晒圍欄畀人登記，等待申述團體代表到場發表意見，可謂萬事俱備嘞，但殊不知等了又等，都未見佢哋蹤影，結果等咗成一個鐘，到咗早上十點依然一個人都冇。

換言之，全部甩晒底喇！周達明隨即宣布會議流會收場，會議訂喺周三朝早九點再繼續。

據了解，為期兩日嘅申述會原本有逾一百人表達意見。至於聽日嘅會議會唔會酌情畀缺席者表達意見，就要委員再傾吓先。

古洞北發展關注組主席李肇華接受查詢時辯稱，估計東北規劃組成員朝早應該有其他緊要事忙緊，所以嚟唔到，強調佢哋會把握聽日最後一場申述會講意見。如無意外，城規會聽日係最後一日講新界東北發展計劃嘅意見，再次「甩底」就真係與人無尤。