豬欄劏房無王管 香港淪為難民港

呢，近日元朗先後發生兩宗大火，其中吳家村火災造成一名斯里蘭卡籍男子死亡。兩單火警有個共通點，建築物都係僭建嘅鐵皮屋，居民都係非華裔人士。記者巡查區內多處黑點，發現唔少農地非法僭建，甚至將豬欄雞欄改為「住宅」，間出幾十間劏房租畀南亞裔人士，當中多數係申請酷刑聲請嘅所謂難民。

唔使問阿貴，棲身於豬欄雞欄，除咗衞生環境惡劣，而且危機四伏。呢啲非法搭建嘅劏房，多數使用木板、鋅鐵等材料，牆上電線裸露，有啲只用膠紙包住，部分劏房甚至完全密封，裏面放滿石油氣罐，睇見都牙煙。正如學者話齋，密封空間使用石油氣爐容易積聚一氧化碳，隨時足以致命，萬一發生氣體洩漏，後果更加不堪設想。有立法會議員直指呢類搭建嘅房屋多數違法，地政總署巡查不力，等同埋下計時炸彈，分分鐘一鑊熟。

唔係靠嚇o架，過去四年涉及寮屋嘅火警接近四百宗，造成十三人死亡。近日元朗發生嘅兩宗僭建物大火，已經敲響警鐘，豬欄劏房遍地開花，隨時死得人多。

正所謂，有頭髮冇人想做瘌痢，呢啲環境惡劣兼危機四伏嘅豬欄劏房都有人住，一方面顯示香港房屋問題惡化，另一方面證明假難民問題嚴重。有位南亞裔租客坦言，日日提心吊膽驚火燭，但其他地方租金太貴，根本負擔唔起。

唔講唔知，目前全港有七千多名呢類透過酷刑聲請滯留香港嘅非華裔人士，其中一半居住屯門及元朗，除咗導致非法劏房氾濫成災，而且對區內居民造成嚴重滋擾，早就怨聲載道，可惜當局一直闊佬懶理。

最令人反感嘅係，部分酷刑聲請者無所事事，周圍撩是鬥非，甚至參與犯罪活動，搞到烏煙瘴氣。除咗屯門及元朗，中環蘭桂坊亦係重災區，假難民搶佔地盤，胡作非為，賣淫販毒樣樣做齊，簡直七國咁亂，蘭桂坊淪為人間妖域，問你怕未。

講到底，皆因港府效婦人之仁，對假難民大開中門，先至造成呢個尾大不掉嘅亂局。咪話太一叮唔提醒，如果港府再唔正視問題，剷除禍根，唔止豬欄劏房遍地開花，香港遲早變成難民港添吖，叮！