政壇：搞搞政：區選生力軍崛起 泛民老鬼等摺埋
今年年底有區議會選舉，大批佔領行動後湧現嘅政治新勢力打算搶地盤，狙擊對象除咗有建制派外，傳統泛民主派亦可能遇襲，當中民主黨（白鴿黨）嘅危機更高，因為激進泛民新勢力都唔多接受佢哋，老鴿如「AV仁」何俊仁及涂謹申、甚至民協馮檢基都冇面畀，睇嚟，泛民陣營喺區選中進一步撕裂嘅可能性都好大，搶位戰更一觸即發添。
呢批區選生力軍大致分為三類，除咗激進網民同高學歷年輕人，據知一批同樣高學歷嘅中年專業人士都有意分一杯羹，好似另組新法律組織「法政匯思」嘅律師任建峰就係例子之一。呢班人學歷高、辯才好，每人身後更有條「大水喉」，參選又唔怕輸，反而泛民老將就麻煩喇，到底要同呢批生力軍維持點嘅關係呢？最怕就係泛民老人笑面相對，但畀人喺公開場合又窒又鬧，咁就冇面喇。
據知，部分泛民政黨率先四出收風，睇吓呢批生力軍係咪必定參選，更有意整合佢哋出選意向，避免自己人打自己人。不過，傳統泛民自己都識講啦，呢批生力軍係唔滿意佢哋做唔到嘢先至出嚟參選，最終係咪聽佢哋支笛，相信答案不言而喻喇。
