政壇：藍爺遊故里念救命恩人

港鐵沙田站旁有條古厝及藍氏家祠等歷史建築物並列嘅排頭村，吸引唔少人去尋幽訪勝，人稱「藍爺」嘅藍氏家族第八代後人兼博愛醫院永遠顧問藍國慶，早幾日特登帶太太王雲仙（Mina）返去行吓，見到一草一木，不期然諗起童年趣事。最難忘係有次爬樹時差啲冇命，可惜已搵唔番當年嘅救命恩人。

藍國慶（中）帶太太（右）訪家祠，與哥哥藍國偉話家常。

藍爺話小時候佢同一班小玩伴好鍾意爬樹摘生果，有次佢爬上一棵樹摘荔枝，摘得太入神成個人懸吊在半空，搞到唔上唔落。幾名大人見狀即喺樹下打算救佢，但未等得切大人埋位，佢就因體力不支跌咗落嚟，最終有個好心人奮不顧身接住佢，但嗰個人就因此受傷。藍爺對呢位救命恩人一直銘記於心。

村內有間知名嘅茶餐廳及薄餅店，店主就係藍國慶嘅哥哥藍國偉。而自細喺外國長大嘅藍太亦笑稱，自己唔小心做咗村姑，依家就升呢做村長夫人。