政壇：阿Ann亂鬧人「福水」掀風波
政圈好重視民意，經常挑剔政府官員民望低嘅立法會就有口話人，冇口話自己，其實，無論係泛民同建制派議員，近年民望都一跌再跌，因為佢哋嘅公職表現實在太令人失望，唔係流會、遲到，就係睇AV、打遊戲機，即使與會，都經常雲遊太虛、或者因為小事嗌大交，浪費公帑兼議會時間，堂堂立法會搞到成日變小學雞課室。尋日建制派嘅蔣麗芸（Ann）又同人力嘅陳偉業（大舊）鬥嘴，兩個加埋過百歲嘅議員，口水戰嘅導火線卻係一句政棍，同一個叫「陳福水」嘅子虛烏有嘅名，真係令人又好氣又好笑。
與大舊互駁火
事緣立法會工務小組委員會尋日開會，本來係討論各項建造工程嘅開支，包括城市地下空間發展。人民力量陳偉業發言時，批評政府規劃混亂，講講吓，佢仲爆咗句「唔知聽到邊個陳福水嘅意見」，又指政府官員「畀二打六政棍牽住鼻子走」。大舊呢番言論，本嚟係泛指某一個人，即係唔知乜水，但建仔嘅阿Ann一聽就唔滿意，即刻出聲表達不滿，原來佢誤以為大舊喺度鬧建仔係政棍，仲以為真係有個政棍叫做「陳福水」添。
阿Ann尋日開會時似乎不在狀態，一聽到大舊提及民建聯同政棍字眼時好敏感，以為大舊鬧緊黨友，所以佢即刻引用議事規程要求對方解釋，大舊隨即澄清話，政棍係指要喺灣仔、銅鑼灣搵地下城做研究嘅人，唔係鬧喺邊境搵地做購物城嘅人，仲趁機諷刺一下：「喺邊境做嗰啲就發大財，好似陳福水咁亂點人起地下城就係政棍」。
主持呢個會嘅公文袋梁家傑都笑笑口趁機「抽水」，話理解大舊口中嘅政棍係「陳福水」。點知阿Ann以為真有個人叫「陳福水」，仲問側邊嘅人「陳福水」係邊個，霎時間官員及議員笑成一片，認真搞笑。一個委員會，上上下下都係咁，唔怪之得立法會議事效率咁低喇。
