與其日日反水客 不如叫停個人遊

唔係誇張o架。反水貨客示威愈來愈暴力，愈來愈失控，一時「光復上水」，一時「光復沙田」，聽日輪到「光復元朗」喎，示威者所到之處，旅客被圍，商舖拉閘，警方出椒，已經係指定動作，冇人知道到時會發生乜嘢事。嗱，有元朗鄉紳講到明，當地居民一向團結，一方有事，八方支援，遇到暴力行為絕對唔會啞忍，有人甚至聲稱會對搞事者「以牙還牙」添。山雨欲來風滿樓，問你怕未。

話時話，水貨活動遍地開花，早就唔再局限喺新界區。早前網上瘋傳一幅水貨客將電車當貨車嘅照片，如果咁又要搞場「光復電車」行動，香港就永無寧日嘅喇。最諷刺嘅係，示威者開口埋口「捍衞」、「光復」，其實次次都搞到七國咁亂，烏煙瘴氣，滋擾程度仲嚴重過水貨客喇。

講嚟講去，水貨問題之所以愈演愈烈，搞到中港矛盾不斷惡化，都係因為兩地政府溝通不足。特別係港府，一早知道旅客人數已超出負荷，但拖到依家至話要檢討個人遊及一簽多行喎，仲有冇再遲啲呀。所以話，冤有頭，債有主，水貨問題主要係港府無能引起，激進組織應該針對港產官僚至啱，而唔係攞無辜市民及旅客嚟出氣。再講吖，如果佢哋真係咁有勇氣，不如去北京「光復王府井」吖，笨！

講真，要徹底解決水貨亂象，其實話都冇咁易，只要中央一聲令下，唔好話叫停「一簽多行」，「不簽不行」甚至乾脆取消個人遊都得。正所謂，針無兩頭利，香港人又想賺旅客錢，又想耳根清淨，世界上邊有咁着數o架。好簡單，冇咗個人遊撐住，旅遊、飲食、零售、酒店等行業肯定會掀起結業裁員潮，有人甚至預言股市將即時唔見一千點添，都咪話唔得人驚。

正如歌仔所唱，「莫道你在選擇人，人亦能選擇你」。今年春節訪港內地客錄得近十年來首次跌幅，已經係一個警號。仲有吖，愈來愈多內地人抵制遊港，有網民仲上傳剪爛咗嘅港澳通行證照片添。鬼咩，香港郁吓就「光復」，郁吓就「驅蝗」，好客之都變趕客之都，係人都怕怕，旅客唔避而遠之至奇喇，叮！