「虫哥,恭喜發財!」你滷味,今日年初幾呀,呢個肥豪放完大假返嚟,仲夠膽死走嚟乞利是?真係當我少膽虫流o架?就喺全新聞創作部員工眼底下,我狠狠咁執咗肥豪一劑,你話吖!你話吖!呢啲x街係咪犯賤先!

無端端畀肥豪搞到着晒火,本虫索性將新正頭啲冤屈氣一次爆晒出嚟:「膠麟、白面書生!你兩條廢柴,婚都結咗九萬幾年,點解早兩日仲咁厚面皮收我成百蚊一封嘅利是?」兩條廢柴見本虫春後算帳,先是驚惶,繼而失禁,再而扮死,由終本虫分唔清白面書生到底係天生嘅白定係瀕死嘅白,所以call咗白車送走佢哋,算佢兩個走運嘞。

擾攘咗一個下午,本虫食完晚飯返嚟,果然見到枱頭放滿晒班廢柴嘔番出嚟嘅利是,仲要封封紅衫魚。哈,點樣將十蚊變一百蚊?唔使問股神嘅,問我少膽虫啦!本虫與天下主管共勉之。

第一手消息請下載on.cc東網iPhone/iPad/Android/Windows Phone Apps