政壇：搞搞政：被爆僭建職位自肥 濫權周一鑊發爛渣
食物及衞生局前局長、現任平等機會委員會（平機會）主席周一嶽（周一鑊）早前被本報踢爆，喺未充分諮詢其他平機會委員下，自把自為建議喺平機會架構下加設月薪超過十六萬元嘅營運總裁，被疑濫權「自肥」，公眾嘩然！但周一鑊就一直玩潛水，尋日終現身一個活動，全程「笑騎騎」嘅佢，一提到「營運總裁」就即刻黑口黑面兼發爛渣，解釋係斷章取義喎。
可卸走大半工作量
周一鑊喺公關擋駕下「嬲爆爆」走向電梯口，問多兩問，面色由黑轉紅，氣沖沖拋咗句「營運總裁係評審委員會同立法會多年來一直爭取嘅，無嘢再回應喇！」跟住就急急腳走人。到咗傍晚，平機會發聲明解釋，話民政事務局同審計署早年檢討後，都分別建議將平機會主席同行政總裁兩個職位分拆，互相制衡，所以平機會建議重設「營運總裁」一職。
件事鬧出咁大爭議，皆因月薪二十三萬元嘅周一鑊本應兼顧平機會嘅行政同營運兩項重要工作，加設營運總裁一職後，周一鑊嘅工作量就減少一大半，但人工照舊，咁唔係「疊床架屋」又係咩﹖何況，立法會建議平機會加設營運總裁時，係要求主席減薪配合，可惜多年未成事，依家周一鑊斷章取義，加人但自己唔提減薪，認真識歎！
