農曆新年係中國人最重視嘅傳統節日,家庭主婦都會出力炮製美食招呼親友,香港教育學院校長張仁良嘅法籍太太Christine都唔例外,三十年前嫁畀張仁良來港定居後,就好努力學習中國文化、語言同廚藝,尋日教院舉行春茗,Christine就親自下廚整蘿蔔糕畀大家品嘗。張校長賣口乖話覺得好好味,叫大家客觀畀食評,見個個都食到唔停得口,就知張太手勢一流啦!

Christine(左)炮製嘅蘿蔔糕色香味俱全,氹得張仁良(右)笑到見牙唔見眼。

操流利廣東話嘅Christine仲大爆二人嘅甜蜜往事,原來當年張仁良去法國留學,咁啱同Christine住埋同一幢學生宿舍,好快就畀Christine嘅魅力吸引,仲憑一碟冬菇炆雞成功奪芳心,自此Christine就迷上中國菜,最鍾意食蒸魚、點心。問張仁良依家有無再整冬菇炆雞冧老婆,佢就話依家好少食雞,但兩公婆得閒就會去買餸玩煮飯仔,非常恩愛。

第一手消息請下載on.cc東網iPhone/iPad/Android/Windows Phone Apps